ШИНЭ БИЧЛЭГҮҮД
// Сутайн суран хөхүүд - бодрол, хүүрнэлүүд
my ideas
my ideas
Хэрэв ээ би шидтэн бол (мөрөөдөж байна)
Бичигдсэн огноо: 2012-04-23
Хэрэв би түүхч байсан бол эсвэл баян байсан эхлээд эдгээр ажлуудыг хийж эсвэл санхүүжүүлэх байсан:
1-р үе шат
Монгол Алтайн нурууны хадны сүг зураг судлах, байршлыг GPS-ээр тогтоож хадны сүг зургуудын байршлын харуулсан газрын зураг хийх, сүг зургуудыг масштабын дагуу яг бодит хэмжээгээр нь буулгаж авах, бүртгэх. хэрэв боломжтой бол энэ ажилтай хамт хөшөө цайдмаас эхлээд баруун тийш үргэлжлэх бүх хиргэсүүрийг уул уурхай ухаад гаргачхаас өмнө тоолж бүртгэх ажлыг цугт нь хийх... (энэ жил баруун Монголд бүртгэгдээгүй 7 шинэ сүг зураг олсноос хамгийн сонирхолтой нь бодон гахайн сүг зураг байлаа.)
Бүх аймаг сумын төв болон хот суурингуудын хөшөө дурсгалын зургийг авах, материалын хийц, барималчийн нэр, хийсэн он, юуны дурсгал болох тухай тайлбар бичиг хийх. Хамгийн эхлээд Еншөөбү овогт Бямбын Ринчен гуайн хөшөөний тухай, түүхэн хүнийх нь тухай сурвалжилж, хөшөө хэдэн онд хэн гэдэг хүн ямар материалаар хийсэн гэх мэт баримт бүрдүүлнэ... хөшөө бүр дээр ийм баримт цуглуулж соёлын аялал жуулчлалын томоохон хөтөч ном бий болгох. Түүнийгээ Англи, Япон, Франц, Герман хэл дээр орчуулах. Аймаг тус бүрээр аялал жуулчлал ба түүхийн чиглэлээр төгсөж байгаа их дээд сургуулийн оюутнуудад диссертац бичих төсөл уралдаан зарлах байдлаар нэг стандартаар бичсэн эрдэм шинжилгээний өгүүлэл ба эрдмийн ажлуудыг цуглуулж авторуудын нэрийг бүлэг тус бүрээр оруулах... ийм маш гоё зурагт хуудаснууд бүхий цоморлогийг хамгийн хямдаар сургуулиудтай яриад л хийчхэж болохоор байна. хэвлэлд л жаахан мөнгө орно судалгааг голдуу тус орон нутгаас гаралтай оюутнууд хээрийн ажил, дадлага энэ тэрийн үеэрээ багш нарын хамт бүрдүүлнэ.
2-р үе шат.
Монгол орны хилийн шугам дагуу морин болон мотоциклтой аялал хийх, үлгэр домог цуглуулах,... Амайтай хамт явмаар байгаам, Монгол доо аялах санал тавиад...
Оюутан солилцоогоор Монголд сурч буй Хазара Монголчуудаар Араб Перс хэл гэрээр заалгах.... (үгүй дээ хүүхдүүд дээ заалгамаар) тэгээд судрын чуулганыг перс хэлнээс дахин орчуулах, араб перс хэл дээрх Түүхийн баримтуудыг шинээр нээн орчуулах, Хятад хэл дээрх түүхэн бичиг баримтуудаас Монголтой холбоотой хэсгүүдийг түүвэрлэн орчуулга хийх, орчуулга эрдэм шинжилгээний хувийн хүрээлэн байгуулах, өвөр монголчуудаа татан оруулж, эрдмийн ажил аа хийх боломжийг эх орондоо хангаж өгөх, ... эх орондоо хайртай, үүх түүх ээ сонирхогчдын гишүүнчлэл ба хандиваар санхүүжүүлэх...
3-рт :
Жил бүр "Монгол Арт" нэртэй фото календарь гаргаж байх. Маш том, маш чанартай, маш үнэтэй, бүгд МАШ байхаар хийнэ. жил бүр өөр өөр чиглэлээр, эхний жил монгол морь, дараа нь Монгол ан гэх юм уу эсвэл чоно гэдэг ч юмуу, дараа нь байгаль, гэх мэтээр... үүнийг фото студи дунд фото сонирхогч дунд уралдаан зарлах маягаар хийж болно бас үүнийг "national geographic" хамтарч болох юм...
4-рт :
"Миний Нутгийн газар шорооноос бурхан гуйсан ч бүү өг" гэсэн үгийг Модун шаньюйгаас Галдан бошигт, Чин ван Ханддорж хүртэл хэрхэн өв уламжилж захиж байсан тухай судалгаа хийх. "Жанжхүүгийн даваа ( Жан Жиа Коу ) -наас хойш Хятад шахааны мөр бүү гарга" гэсэн тангараг хүртэл түүхэн цаг хугацаанд өрлөг түүх яаж хадгалагдаж дамжин уламжлагдаж ирэв ? уламжлагдах арга маягийг онцгойлон судлах, аман яриа ам дамжуулгаар өвлүүлэх нь 2 мянган жилийн туршид яаж амь бөх байж ирэв ? гуйвсан уу?
Монголын их хаадын бусад улс оронд илгээж байсан албан бичгүүдийг өдгөө байгаа улс оронд нь очиж хуулбарлан авах, сэргээх, Дэлхийн томоохон түүхийн музейд буй монгол угсаатантай холбоотой эд өлгийн зүйлсийг бүртгэх судлах, орчуулах гэх мэт төслүүдийг эхлүүлэх санхүүжүүлэх шаардлагатай байгаа юм. энэ ажлаар Ш.Бираа гуайн дэвшүүлсэн "Тэнгэризм"-ийн онолд хэрэгтэй их олон баримт сэлт шинээр олдох байх... Хүн төрөлхтний түүхэнд анх удаа морин дээрээс гэрээ хэлцэл хийж, аян дайныг ар хударгаар хутга шаалгүй "ял асууж" аян шалтаг тоочиж байж дайныг эхлүүлдэг байсан эрэлхэг нүүдэлчдийн цөс зориг, хууль цааз, итгэл үнэмшил, дарангуйлал цөм тэдгээр бичиг сэлтэд бий... гэрээний барьцаа хүнээр хааны ургийн хүнийг авч үлддэг байсан Хүн гүрнээс эхлээд Нүүдэлчид элчин сайдыг суулгах эхэлсэн ч юм билүү, ambassador гэдэг үг чинь амбан сайд,... гэсэн монгол үгийн гаралтай, бүх хэлэнд Хаан гэдэг үг кинг гэх мэтээр оршин байдаг нь эзэлж явсан нүүдэлчид өөрсдийн эздээ дууддаг нэрээс үүдэлтэй ч юм билүү... Ромоос Шахууд хүртэл, Их хамбаас, Ил хаадууд хүртэл албан бичгийг хөх тэнгэрийн зарилгаар... айтугай эмээтүгэй хэмээ бичиж байсан биз... үгүй дээ тэдний зурагтай товхимол гаргавал мөн гоё оо...
5-рт:
Бүх сумын төв рүү Британик нэвтрэх толь, "Монголын уран зохиолын дээжис" 108 боть, Дэлхийн шилдэг уран зохиолууд гээд... шинэ үеийн уран зохиол орчуулгын номууд, Аюурзанын "шинэ үеийн номын сан" цувралаас эхлээд "эдийн засгийн алуурчны наманчлан" хүртэлх сүүлд гарсан бүх номуудыг явуулдаг өргөн уудам салбартай тохилог хувийн номын сангийн том сүлжээ байгуулах...
шинэ үеийн залуус хүүхдүүд хэзээ ч төрийг царайчилдаггүй, хүний гар хардаггүй болгохоор түүхээ мэддэг байхаар тийм үр өгөөжтэй төслүүдийг алгаа тосож гуйлга гуйхгүйгээр, төрөөс огт, юу ч нэхэхгүйгээр өөртөө ашигтай хийж хэрэгжүүлэх юмсан...
үгүй дээ хийх чадамжтай хүмүүст сэдэл санаа болох юмсан даа.
блог оо монгол бичгээр бичиж байх гээд л... хийх ажил их, хүсэл мөрөөдөл хязгааргүй байна.
Үнэн дээ бол би эдгээр ажлаас хамгийн ихээр "ирвэс барын зураг дараад туйлын туяаг кадрт буулгаад л зургийн аппараттай зугаалж явах, майханд амьдарч тамхи нэрж суухыг л" илүү хүсэж байна. хэдэн гоё хөнгөхөн, хэвлэлт сайтай ном үүргэвчин дээ хийгээд л болоо...
Дэлхий сүйрэх үү энхбаяр хөл нүцгэн үү надад падлий алга өө.
Нийт 1667 удаа уншигдсан | 5 сэтгэгдэлтэй
RSS тандагч
Сэтгэгдэл бичих